Ish-ministri i Jashtëm i Shqipërisë, Paskal Milo, ka kritikuar zhvillimet politike në Kosovë, ku vendi drejtohet drejt zgjedhjeve të parakohshme për shkak të mungesës së dakordësisë mes partive për zgjedhjen e Presidentit të ri. Në një intervistë për News24, ai theksoi se partitë politike kanë treguar papërgjegjësi ndaj votuesve.
Milo drejtoi gishtin tek të gjitha palët, duke thënë se po sillen si aktorë të papërgjegjshëm në një moment delikat për Kosovën. Ai vlerësoi se klasa politike nuk përfaqëson as minimumin e ndërgjegjes politike ndaj shqiptarëve që i votojnë, duke e lidhur sjelljen e tyre me instinkte, jo me politikë të ndërgjegjshme.
Duke theksuar përgjegjësinë më të madhe te mazhoranca, Milo përmendi Lëvizjen Vetëvendosje, e cila fitoi 51% të votave dhe mori mandat të qartë për qeverisje. Ai argumentoi se kjo forcë duhej të kishte gjetur kompromis me njërën nga dy forcat e tjera për të siguruar qeverisje normale. "Nuk qeveriset me dhunën e kartonëve", tha ai, duke paralajmëruar se kushdo në pushtet duhet të bëjë kompromise të duhura.
Milo vlerësoi se Kosova po futet në një rreth ciklik krizash dhe se zgjedhjet e reja nuk garantojnë zgjidhje. Ai cilësoi si ide të rrezikshme përqendrimin e pushteteve në një dorë dhe etjen për pushtet, që bën partitë të dalin jashtë normave. Ndërkombëtarët, sipas tij, janë lodhur me Kosovën, ndërsa kryeministri nuk dëgjon për kompromis në interes të vendit.