Partia Demokratike ka ngritur akuza ndaj qeverisë shqiptare në lidhje me menaxhimin e fondeve publike dhe shpenzimet e larta për automjete të administratës. Në një deklaratë për mediat, zëdhënësja për Antikorrupsionin, Genta Vangjeli, vuri në dukje se kryeministri Edi Rama u shfaq në Pogradec, pas një mbledhjeje të qeverisë, me një automjet tip Mercedes-Benz S, vlera e të cilit tejkalon 100 mijë euro.
Sipas opozitës, ky rast është tregues i një praktike të vazhdueshme të administratës shtetërore, e cila shpenzon miliona euro për luks, në kundërshtim me retorikën qeveritare për kursime dhe përgjegjshmëri financiare. Duke iu referuar të dhënave nga Open Procurement, PD theksoi se mbi 10 milionë euro kanë shkuar për blerje, qira apo leasing automjetesh, kontrata të cilat pretendohet se janë përqendruar te një rreth i ngushtë operatorësh ekonomikë, mes të cilëve u përmend biznesi Mektrin Motors, i lidhur me familjen e Emirjana Sakos.
Në denoncimin e saj, Partia Demokratike përmendi gjithashtu një procedurë të re prokurimi të realizuar nga Ministria e Ekonomisë dhe Inovacionit, e drejtuar nga Delina Ibrahimaj. Sipas PD-së, kjo ministri ka hapur një procedurë për blerjen e 3 automjeteve me një kosto prej 200 mijë eurosh. Opozita ka kërkuar ndërhyrjen e SPAK-ut për të hetuar mënyrën e shpenzimit të këtyre fondeve, duke pretenduar se këto kontrata favorizojnë subjekte të caktuara pranë pushtetit.