Grupi parlamentar i Partisë Demokratike ka depozituar kërkesën zyrtare për një mocion me debat në Kuvend, pas miratimit të raportit të Parlamentit Evropian për Shqipërinë për vitin 2025. Dokumenti, i nënshkruar nga kreu i grupit, Gazment Bardhi, kërkon trajtimin e menjëhershëm të 20 gjetjeve të evidentuara nga institucionet evropiane, të cilat sipas opozitës cënojnë procesin e integrimit të vendit.
Ndër shqetësimet kryesore të listuara në kërkesën e opozitës përfshihen:
• Mungesa e barazisë së kushteve për aktorët politikë;
• Keqpërdorimi i burimeve administrative dhe financimi i partive politike;
• Akuzat për blerje votash dhe presionin mbi votuesit;
• Polarizimi i vazhdueshëm politik dhe diskursi konfrontues.
Opozita kërkon gjithashtu adresimin e rekomandimeve të ODIHR-it dhe Komisionit të Venecias për reformën zgjedhore, për të siguruar transparencë dhe besim publik në zgjedhjet e ardhshme. Përtej aspekteve zgjedhore, opozita ka vënë theksin te shqetësimet lidhur me ndikimet negative të projekteve të zhvillimit, siç është ai i resortit në Zvërnec, duke vlerësuar se këto çështje janë vendimtare për rrugëtimin e Shqipërisë drejt Bashkimit Evropian.