Deputetët e Partisë Demokratike dhe opozitës, anëtarë të Komisionit Parlamentar të Ekonomisë, Punësimit dhe Financës, i kanë kërkuar zyrtarisht Kontrollit të Lartë të Shtetit (KLSH) një auditim për përputhshmërinë dhe ligjshmërinë e financimit të koncertit të këngëtarit Kanye West, mbajtur në Tiranë më 11 korrik 2026.
Në një deklaratë për mediat, deputeti Enno Bozdo theksoi se përdorimi i 4.3 milionë eurove nga fondi rezervë i buxhetit të shtetit për një aktivitet privat është i paligjshëm. Sipas opozitës, ky fond është i destinuar për përballimin e emergjencave dhe fatkeqësive natyrore, si zjarret, tërmetet apo përmbytjet, dhe jo për organizime të kësaj natyre.
Opozita kërkon që KLSH të verifikojë veçanërisht:
- Kohën e nisjes së negociatave për koncertin, për të parë nëse ato kanë qenë të planifikuara përpara miratimit të buxhetit të vitit 2026.
- Ekzistencën e një preventivi të detajuar për shumën e alokuar, në përputhje me Udhëzimin nr. 9 të buxhetit.
- Përmbushjen e kritereve kushtetuese të "nevojës dhe urgjencës" që justifikojnë miratimin e një akti normativ nga Këshilli i Ministrave.
Deputeti Bozdo akuzoi gjithashtu kryeministrin Edi Rama se e ka përdorur këtë koncert si mjet për të larguar vëmendjen nga protestat opozitare që vijojnë prej dy muajsh, duke e cilësuar vendimin si një "zjarrfikëse sociale".