Kryetari i Grupit Parlamentar të Partisë Demokratike, Gazment Bardhi, i është drejtuar me një letër zyrtare kryetarit të Kuvendit, Niko Peleshi, duke kërkuar marrjen e masave të menjëhershme për ngritjen e një Komisioni Hetimor parlamentar. Ky komision synon hetimin e përdorimit të burimeve shtetërore dhe përfshirjen e mundshme të krimit të organizuar në zgjedhjet e 11 majit.
Në argumentimin e saj, opozita thekson se vendimi nr. 62/2026 i Gjykatës Kushtetuese, i cili detyron Kuvendin të ndërmarrë këto procedura, është botuar në Fletoren Zyrtare nr. 157 më 22 korrik 2026. PD argumenton se, në përputhje me nenin 87 të Rregullores së Kuvendit, Këshilli i Legjislacionit duhej ta kishte shqyrtuar çështjen brenda 30 ditëve nga hyrja në fuqi e vendimit.
Në dokumentin drejtuar Peleshit, Bardhi vlerëson se mosveprimi i deritanishëm, i cili zgjat prej më shumë se dy muajsh, përbën një shkelje të nenit 132 të Kushtetutës së Republikës së Shqipërisë. Opozita e cilëson këtë situatë si një cenim të drejtpërdrejtë të të drejtave të pakicës parlamentare dhe parimeve bazë të shtetit të së drejtës. Në përmbyllje të shkresës, Grupi Parlamentar i PD-së ripërsërit kërkesën për përmbushjen e detyrimeve të përcaktuara në shkresën nr. 3452 Prot., datë 27 korrik 2026.