Partia Demokratike ka reaguar përmes një deklarate për media, duke dënuar atë që e konsideron si përbaltje të qëllimshme ndaj figurës së Heroit të Kombit, Tahir Sinani, dhe luftëtarëve të Ushtrisë Çlirimtare të Kosovës (UÇK).
Në qëndrimin e saj, PD akuzon kryeministrin Edi Rama dhe ministrin Taulant Balla për orkestrim të këtij sulmi, duke e cilësuar atë si një akt "të ulët, antishqiptar dhe serbomadh". Sipas demokratëve, kjo përpjekje shkon në dëm të vlerave të luftës për çlirimin e Kosovës, të cilën Partia Demokratike e konsideron si faqen më të ndritur të luftërave të shqiptarëve për liri dhe dinjitet kombëtar, pas epokës së Skënderbeut.
Opozita ka dënuar me forcë çdo përpjekje që, sipas saj, synon njollosjen e heronjve dhe të rënëve të luftës, duke i cilësuar veprimet e eksponentëve të qeverisë si në kundërshtim me interesat kombëtare.