Dega e Partisë Demokratike në Elbasan po zhvillon këtë të diel zgjedhjet për kryetar të ri. Në garë janë 5 kandidatë: Lumturi Hasa, Durim Cekrezi, Elior Vila, Sokol Shkëlzeni dhe Alis Narazani. Rreth 2400 anëtarë kanë të drejtë vote, ndërsa procesi nisi në orën 08:00 dhe pritet të përfundojë në 18:00.
Durim Cekrezi drejton përkohësisht degën pas largimit të Blendi Himçit. Lumturi Hasa është mjeke dhe ish-kandidate për deputete, e vetmja grua në garë. Elior Vila është pedagog, ndërsa Sokol Shkëlzeni ka përvojë të gjatë në strukturat e partisë.
Gjatë këtij procesi, disa anëtarë u përjashtuan nga lista e anëtarësisë. Doris Madhi, drejtuese e grupit të këshilltarëve të opozitës në Këshillin Bashkiak të Elbasanit, u hoq pa njoftim paraprak. Ajo deklaroi se "vendimet merren në mënyrë arbitrare dhe jashtë çdo rregulli. Ky proces nuk është më demokratik". Madhi përmendi se përjashtimi erdhi me propozim të degës, pasi zëra si i saj rrezikojnë të prishin marrëveshjet.
Nga lista u hoqën gjithashtu Zheni Gjergji, e emëruar drejtoreshë në Spitalin e Elbasanit, dhe Alesia Balliu, drejtuese e demokratëve në Këshillin Bashkiak. Kjo e fundit kishte shpallur ambicien për të kandiduar kundër Sali Berishës për kreun e Partisë Demokratike.
Kjo valë përjashtimesh vjen disa ditë pasi Partia Demokratike përjashtoi këshilltarët Dritan Burgijën dhe Arlind Boshkun në Këshillin Bashkiak të Durrësit, për mbështetje ndaj lëvizjes së Ervin Salianjit.
Përditësime
Partia Demokratike përjashton Rudinën Allë, kryetaren e Forumit Demokratik të Gruas, nga lista e anëtarësisë në Elbasan, para zgjedhjeve të degës.
Zhvillime të reja:
• Elior Vila kërkon një PD më të hapur.
• Alis Narazani përfaqëson një brez të ri politik.
Alesia Balliu e quan vendimin për përjashtimin e saj personal të Sali Berishës, Flamur Nokës dhe Blendi Himçit, të cilët e propozuan për ta penguar kandidimin e saj kundër Berishës për kryetar të PD-së.
Mbledhja e Kryesisë së PD Elbasan u zhvillua me rreth 15 anëtarë, pa kuorum dhe pa votim.
Balliu e shpall vendimin nul dhe do ta ankojë në instancat përkatëse.
Alis Narazani u zgjodh kryetar i degës së PD-së në Elbasan me 477 vota (Sokol Shkëlzeni: 319, Durim Çekrezi: 249, Elior Vila: 88, Lumturi Hasa: 66).
Në votim morën pjesë 1.208 anëtarë nga 2.400 me të drejtë vote.