Dorian Teliti, këshilltar për çështjet ekonomike dhe koordinatori për programin ekonomik në Partinë Demokratike, prezantoi paketën financiare prej 4 miliardë euro për periudhën 2026-2040. Kjo alternativë politike u publikua në një reagim në rrjetet sociale, ku Teliti kritikon situatën aktuale ekonomike dhe shoqërore në Shqipëri.
Sipas Telitit, qytetarët përballen me rritje çmimesh, paga dhe pensione më të ulëta në rajon, pasiguri ekonomike dhe mungesë perspektive. Familjet mezi përballojnë jetesën, ndërsa të rinjtë largohen masivisht, duke e kthyer emigracionin në shenjë të varfërimit dhe zbrazjes së vendit nga politikat aktuale.
Paketa synon të adresojë këto probleme me masa konkrete:
- Mbështetje për familjet: bonus për lindje, pagesa mujore për fëmijët dhe lehtësim shpenzimesh për arsimin dhe shëndetësinë.
- Lehtësim fiskal për të rinjtë: përjashtim nga TAP.
- Strehim për çiftet e reja: kredi të buta dhe subvencione direkte për banesën.
- Punë dhe prodhim vendas: mbështetje për bujqësinë, zonat rurale dhe linja të reja prodhimi.
- Rikthim dhe qëndrim në Shqipëri: politika për ndalimin e emigracionit dhe kthimin e shqiptarëve në atdhe.
Teliti thekson se kjo paketë mundëson jetesën me dinjitet në Shqipëri dhe shërben si arsye shtesë për protestën e parashikuar më 24 janar, duke kërkuar ndryshim kursi dhe vizion afatgjatë.