Partia Demokratike ka nisur konsultime në terren për reformën administrative-territoriale. Sekretari i përgjithshëm Flamur Noka ka firmosur një udhëzim të brendshëm, që u drejtohet strukturave lokale në të gjitha qarqet e vendit.
Udhëzimi kërkon organizimin e dëgjesave me komunitetet vendore për të mbledhur mendime dhe propozime mbi ndarjen e re territoriale. Në këto aktivitete do të përfshihen këshilltarë vendorë, ekspertë dhe përfaqësues të zgjedhur lokalë.
Mbledhjet e kryesive në çdo degë duhet të zhvillohen brenda datës 15 prill, ku do të diskutohen variantet konkrete të reformës. Propozimet dhe konkluzionet nga takimet në terren pritet të finalizohen dhe të raportohen deri më 20 prill, të shoqëruara me dokumentim nga aktivitetet.
Ky proces zhvillohet në kuadër të punës së komisionit parlamentar për reformën administrative-territoriale, ku opozita synon të kontribuojë në hartimin e një harte të re pranë interesave të qytetarëve dhe nevojave vendore.
Përditësime
Partia Demokratike kërkon përfshirjen e anëtarëve të saj që kanë mbajtur pozicione në institucionet vendore përgjatë viteve.
Strukturat dorëzojnë të dhënat më 20 prill.
Kryesia e PD mblidhet më pas për të vendosur qëndrimin politik ndaj hartës së re territoriale.