Përfaqësues të Partisë Demokratike të Kosovës (PDK) dhe të Aleancës vijojnë protestën para objektit të Qeverisë së Kosovës, duke kundërshtuar mosvazhdimin e seancës konstituive të Kuvendit. Kjo protestë, e cila po zhvillohet prej disa javësh, është zgjeruar ditëve të fundit me pjesëmarrjen e asamblistëve dhe aktivistëve nga komuna të ndryshme, përfshirë Ferizajn dhe Hanin e Elezit.
Deputeti i PDK-së, Elmi Reçica, duke iu referuar një aktgjykimi të Gjykatës Supreme, deklaroi se Albin Kurti duhet të zgjedhë ndërmjet mandatit të deputetit dhe detyrës në ekzekutiv. Ai i bëri thirrje kryeministrit në detyrë që të kthehet në parlament, duke garantuar se opozita do të ofrojë votat e nevojshme për konstituimin e organeve drejtuese të Kuvendit, nëse ai siguron 61 vota për zgjedhjen e qeverisë.
Nga ana tjetër, përfaqësuesit lokalë theksuan se pasojat e bllokadës qendrore janë duke prekur drejtpërdrejt funksionimin e komunave. Alberton Sahiti, kryetar i Aleancës në Ferizaj, deklaroi se mungesa e përkrahjes nga niveli qendror ka shkaktuar probleme me realizimin e projekteve lokale. Ndërsa shefi i grupit të asamblistëve të PDK-së në Ferizaj, Arian Imeri, shtoi se mosfunksionalizimi i institucioneve krijon pasiguri juridike dhe godet interesat e qytetarëve, duke kërkuar një sqarim të menjëhershëm nga organet e drejtësisë për situatën aktuale.
Përditësime
Aksioni protestues para ndërtesës së Qeverisë është intensifikuar me përfshirjen e asamblistëve, drejtorëve dhe aktivistëve të PDK-së nga komuna e Kaçanikut. Ky mobilizim shënon javën e dytë të protestave të vazhdueshme të kësaj partie. Deputeti Elmi Reçica e cilësoi kryeministrin në detyrë, Albin Kurti, si 'vandal politik', duke akuzuar atë për bllokimin e qëllimshëm të proceseve institucionale.
Deputetët e PDK-së dhe AAK-së janë mbledhur në sallën e Kuvendit për të tentuar vazhdimin e seancës konstituive, ndërsa përfaqësuesit e Ambasadës së SHBA-së dhe Zyrës së BE-së po e vëzhgojnë zhvillimin nga afër. Deputetët e Lëvizjes Vetëvendosje kanë bojkotuar seancën duke mos u paraqitur në Kuvend.