Gjykata Kushtetuese e Kosovës ka shpallur antikushtetuese 13 ligje të miratuara nga Qeveria Kurti më 5 dhjetor 2024. Këto ligje u kontestuan nga deputetët e Grupit Parlamentar të Partisë Demokratike të Kosovës (PDK).
Sipas PDK-së, ky aktgjykim konfirmon se shumica qeverisëse ka shkelur Kushtetutën e Kosovës, duke cenuar parimin e ndarjes së pushteteve, rolin kushtetues të deputetit, Rregulloren e Punës së Kuvendit të Kosovës dhe funksionimin e komisioneve parlamentare. Partia thekson se procedurat parlamentare janë përdorur si instrument force politike dhe jo si mekanizëm demokratik i vendimmarrjes.
PDK vlerëson se konstatimet e Gjykatës nxjerrin në pah rëndësinë e veprimit opozitar të përgjegjshëm të saj, duke zgjedhur rrugën institucionale për të mbrojtur rendin kushtetues kundrejt prirjeve antikushtetuese dhe përqendrimit të pushtetit nga qeveria. Partia rithekson se Kushtetuta është themeli i shtetit dhe asnjë shumicë parlamentare nuk ka të drejtë ta relativizojë ose ta shkelë atë në emër të pushtetit momental.
PDK deklaron se do të vazhdojë angazhimin politik dhe institucional në mbrojtje të rendit kushtetues, sundimit të ligjit dhe funksionimit demokratik të institucioneve të Republikës së Kosovës. Sipas saj, shteti i së drejtës mbrohet çdo ditë dhe jo vetëm kur i konvenon pushtetit.