Arian Tahiri, shef i Grupit Parlamentar të Partisë Demokratike të Kosovës (PDK), deklaroi se në seancën e nesërme të Kuvendit të Kosovës do të propozojnë një rezolutë jashtë rendit të ditës. Kjo rezolutë synon që Kuvendi të rreshtohet në mbrojtje të vlerave më të larta dhe të nderimit të viktimave, dëshmorëve dhe martirëve të luftës.
Në emisionin Debat Plus, Tahiri theksoi nevojën për reflektim dhe ndryshime në legjislacion, konkretisht në Kodin Penal, për mbrojtje më të fuqishme të këtyre vlerave.
Deklarata lidhet me ekspozitën e Shkëlzen Gashit, e cila paraqiti të dhëna të pasakta për masakrat në Kosovë gjatë viteve 1998–1999. Sipas Tahirit, kërkesa për mbështetje financiare erdhi nga një organizatë, ndërsa realizimi i projektit u bë nga një tjetër.
Ai kërkoi hetim për të zbardhur pse ndodhi ky manipulim, pse mungon korrektësia dhe pse organizatorët për fondet ishin të ndryshëm nga ata që realizuan projektin. «Pse ka qenë gjithë ky skenar dhe ata që janë përgjegjës duhet të ndëshkohen», tha Tahiri.
Ekspozita u organizua nga organizatat joqeveritare INTEGRA dhe ADMOVERE, me përkrahje të Kuvendit të Kosovës.