Niko Peleshi, kryetar i Kuvendit të Shqipërisë, mbajti fjalim në Forumin për Sigurinë në Kongresin Amerikan në SHBA, ku ngriti shqetësimin për sigurinë në Ballkanin Perëndimor.
Gjatë fjalimit, Peleshi e cilësoi rajonin një hapësirë gjeopolitike të ndjeshme ndaj kërcënimeve hibride dhe ndërhyrjeve të huaja. "Ballkani Perëndimor mbetet i ndjeshëm në aspektin gjeopolitik, i ekspozuar ndaj përpjekjeve të huaja për të minuar stabilitetin, për të dobësuar institucionet demokratike dhe për të shkatërruar besimin te rruga Euro-Atlantike. Ky realitet kërkon vigjilencë, qëndrueshmëri dhe qartësi strategjike. Integrimet euroatlantike dhe anëtarësimi i Kosovës në NATO janë të domosdoshme për sigurinë dhe stabilitetin në rajon", deklaroi ai.
Peleshi kujtoi vendimin e Samitit të NATO-s në Hagë për rritjen e investimeve në mbrojtje, duke nënvizuar se "siguria ka kosto dhe përgjegjësia duhet ndarë". Ai deklaroi se Shqipëria po investon 2.12% të Prodhimit të Brendshëm Bruto në mbrojtje këtë vit, me një trajektore të qëndrueshme rritjeje në vitet e ardhshme për të përmbushur udhëzimet e dakordësuara.
Në forum, ku morën pjesë senatorë, kongresmenë, përfaqësues të lartë të sigurisë dhe personalitete ushtarake amerikane, Peleshi theksoi se partneriteti Shqipëri-SHBA është strategjik, afatgjatë dhe i bazuar në vlera të përbashkëta si demokracia, sundimi i ligjit dhe respektimi i të drejtave të njeriut.