Pentagoni ka urdhëruar rreth 1500 ushtarë aktivë në detyrë të përgatiten për një dislokim të mundshëm në shtetin e Minnesotës, ku po zhvillohen protesta të mëdha kundër fushatës së deportimit dhe agjentëve të shërbimit federal të emigracionit (ICE). Lajmi raportohet nga Washington Post, që citon zyrtarë të mbrojtjes, ndërsa Reuters bën me dije se nuk e ka konfirmuar në mënyrë të pavarur.
Ky zhvillim vjen pas kërcënimit të presidentit Donald Trump për të aktivizuar Aktin e Kryengritjes, nëse autoritetet shtetërore nuk ndalin protestat. Në një postim në rrjetin Truth Social, Trump shkroi: «Nëse politikanët e korruptuar të Minesotës nuk zbatojnë ligjin dhe nuk ndalin kryengritësit që sulmojnë agjentët e ICE, do të zbatoj Aktin e Kryengritjes».
Administrata Trump ka dërguar afro 3000 agjentë federalë në Minneapolis dhe St. Paul, kryesisht në qytete të drejtuara nga demokratët, për të luftuar krimin dhe mbrojtur pronën federale. Tensionet u rritën pas vrasjes së qytetares amerikane Renee Good nga një agjent i ICE më 7 janar.
Protestat e fundit në Minneapolis
Qindra protestues kundër ICE dolën në rrugë të shtunën në Minneapolis, duke penguar një grup prej rreth 10 aktivistësh të ekstremit të djathtë që synonin të marshonin drejt një zone me popullsi të madhe emigrantësh. Protestuesit u mblodhën pranë bashkisë, duke mbajtur pankarta dhe kërkuar largimin e ICE nga Minnesota.
Rreth mesditës, ata rrethuan grupin e ekstremit të djathtë, duke i detyruar të tërhiqeshin. U raportua hedhje balonash me ujë në temperatura rreth -20 gradë Celsius. Policia mbajti distancë, ndërsa pas një ore grupi u largua në një hotel aty pranë. Pati përplasje verbale të vogla, por pa incidente serioze.
Shtëpia e Bardhë e cilësoi këtë si praktikë standarde të Pentagonit për të qenë i përgatitur për vendimet presidenciale. Tensionet në Minneapolis mbeten të larta.
Përditësime
1500 ushtarë të Pentagonit janë tani në Minnesota.
- Renee Good ishte atje si vëzhguese ligjore për aktivitetin e ICE.
- Administrata Trump e quajti atë 'terroriste vendase'.
- Guvernatori Tim Walz mobilizoi Gardën Kombëtare.
- Protestat shpërthyen në të gjithë vendin.
- Zyrtarët e Minesotës i kanë bërë thirrje protestuesve për protesta paqësore.