Ish-trajneri i Manchester Cityt, Pep Guardiola, ka hedhur poshtë mundësinë për të marrë drejtimin e skuadrës amerikane Inter Miami. Sipas raportimeve të tabloidit britanik Daily Mirror, bashkëpronari i klubit nga Florida, David Beckham, e kishte identifikuar teknikun spanjoll si kandidatin kryesor për të zëvendësuar Javier Mascheranon në stol.
Qëllimi kryesor i kësaj lëvizjeje ishte ribashkimi i Guardiolës me Lionel Messin, me të cilin tekniku katalanas ka përjetuar suksese të shumta gjatë periudhës së tyre të përbashkët te Barcelona. Megjithatë, përgjigjja e 55-vjeçarit ka qenë negative, pasi ai është i vendosur të ndërpresë për një vit aktivitetin e tij profesional në futboll.
Pas largimit nga Manchester City, planet e ardhshme të Guardiolës mbeten në qendër të vëmendjes së mediave sportive. Përveç dëshirës për pushim, raportimet sugjerojnë se ai dëshiron të drejtojë një ekip kombëtar në të ardhmen. Ndër destinacionet e spekuluara në qarqet sportive janë kombëtarja e Italisë dhe ajo e Anglisë, ndonëse për momentin nuk ka asnjë konfirmim zyrtar mbi hapat e tij pasues në karrierë.