Performanca e këngëtarit portorikan Bad Bunny në Super Bowl ka regjistruar 4.157 miliardë shikime globale brenda 24 orëve të para, sipas National Football League (NFL), Roc Nation dhe Apple Music, siç raporton The Rolling Stone.
Këto shifra përfshijnë transmetimet live globale, shikimet në YouTube dhe platformat e rrjeteve sociale. Vetëm transmetimi i drejtpërdrejtë në SHBA u ndoq nga 128.2 milionë shikues, sipas Nielsen Big Data + Panel.
Kjo performancë renditet ndër më të ndjekurat në historinë e Super Bowl, menjëherë pas asaj të reperit Kendrick Lamar vitin e kaluar, me 133.4 milionë shikues live.
Suksesi në Super Bowl, i shoqëruar me çmimin Grammy për "Albumi i Vitit", pati ndikim të drejtpërdrejtë në karrierën e artistit. Kënga DtMF kryesoi listën Billboard Hot 100, duke u bërë hiti i parë solo në vendin e parë. Më parë, bashkëpunimi "I Like It" me Cardi B dhe J Balvin kishte arritur të njëjtin pozicion në vitin 2018. Albumi DeBÍ TiRAR MáS FOToS u rikthye në krye të Billboard 200.
Pas eventit, Bad Bunny nisi fazën e re të turneut botëror DeBÍ TiRAR MáS FOToS. Ai përfundoi dy koncerte në Sydney të Australisë dhe planifikon të performojë në Tokyo më 7 mars. Turneu evropian do të nisë në fund të majit dhe do të zgjasë deri në fund të korrikut.