Kryeministri Edi Rama publikoi një fotografi të protestuesit Erlis Sina, i cili qëndroi gjatë natës përpara godinës së Kryeministrisë. Në reagimin e tij në rrjetet sociale, kreu i qeverisë deklaroi se identifikon veten me protestuesin, duke u shprehur se është mik dhe jo armik i tij.
Në një përgjigje publike, Erlis Sina kundërshtoi ashpër këtë qasje. Ai u shpreh se nuk ka asnjë ngjashmëri me kreun e qeverisë, duke argumentuar se Rama është mbajtës i pushtetit dhe përgjegjës për vendimet që ndikojnë në jetën e qytetarëve. Sipas Sinës, qeveria është autore e vështirësive sociale, emigrimit të të rinjve, vjedhjes së votës dhe grabitjes së pronës.
Protestuesi nënvizoi se dalja në shesh është një akt individual, i nxitur nga vështirësitë ekonomike, kostoja e lartë e jetesës, problematikat në sistemin shëndetësor dhe ndjesia e përjashtimit të qytetarëve. Ai refuzoi pretendimin se protestat manipulohen nga algoritmet, influencuesit apo opozita, duke i kërkuar kryeministrit që të mos shfrytëzojë imazhin e tij për të mbuluar dështimet apo përgjegjësitë qeveritare.