Kryetarja e Bashkisë Durrës, Emirjana Sako, bëri me dije se 35 persona janë evakuar në Katund të Ri dhe 55 të tjerë në Sukth, për shkak të përmbytjeve të shkaktuara nga moti i keq. Ngjarja ndodhi në zonat e prekura nga lumi Erzen, ku niveli i ujit arriti kuotat maksimale.
Sipas Sako-s, autoritetet punuan deri në orët e vona në zonën e Durrësit të Ri dhe, mëngjesin e 8 janarit 2026, morën njoftimin për rritjen e nivelit të lumit. Ajo theksoi se nuk kishte prurje të mëdha lokale që të nxirrnin lumin nga shtrati, por dyshohet se ujin e shtuan prurjet nga qytetet e tjera. Kjo situatë përsëritet si në vitin 2021.
Evakuarit u akomoduan në dy hotele, pasi kapacitetet e kavalishencës dhe godinës së ushtrisë ishin ezauruar nga evakuimet në Durrësin e Ri. Pritet evakuimi i rreth 150 personave të tjerë. Sako nënvizoi se prioriteti kryesor janë jetët e njerëzve, ndërsa dëmet do të vlerësohen më pas.
Vdekja e punonjësit komunal
Lidhur me vdekjen e 54-vjeçarit Astrit Hysenaj, punonjës i komunales, i cili dyshohet se humbi jetën për shkak të motit të keq, Sako tha se ngjarja ndodhi jashtë orarit të punës. Sipas të dhënave paraprake nga policia, Hysenaj kishte punuar më 6 janar nga ora 6:00 e mëngjesit deri në 10:30, pastaj ishte larguar. Familjarët telefonuan në orën 16:00 për të pyetur nëse ishte në punë, ndërsa denoncimi u bë më 7 janar.