Rajoni i Katalonjës në Spanjë është goditur nga përmbytje të rënda, të cilat kanë lënë 2 persona të vdekur dhe 1 tjetër të zhdukur në Pineda de Mar, një qytet rreth 52 kilometra në veri të Barcelonës. Kryeministri spanjoll Pedro Sanchez theksoi se situata është veçanërisht e rënduar në zonat përreth Barcelonës, ndërsa shërbimi rajonal i emergjencave ka lëshuar një paralajmërim për rrezik të shtuar nga përmbytjet pranë lumenjve Ridaura dhe Daro në Girona.
Udhëheqësi i Katalonjës, Salvador Illa, bëri të ditur se një burrë humbi jetën në Tordera pas shembjes së një muri të shkaktuar nga kushtet e rënduara atmosferike. Viktima e dytë u regjistrua në komunën Montornès del Vallès, njoftim i cili u konfirmua nga shërbimet zjarrfikëse. Autoritetet kishin lëshuar më herët një alarm të kuq për motin, duke u kërkuar qytetarëve të shmangin daljet dhe zonat e rrezikuara.
Efektet e motit ekstrem janë shtrirë edhe në pjesë të tjera të Spanjës qendrore. Në Madrigueras, reshjet e dendura shkaktuan përmbytje të shpejta, duke bllokuar rrugët dhe marrë me vete shumë automjete. Një grua 102-vjeçare humbi jetën pasi uji hyri në banesën e saj në katin përdhes. Në të njëjtin rajon, ekipet e shpëtimit ndërhynë për të nxjerrë në siguri rreth 90 persona të bllokuar nga ujërat.
Situata mbetet e paqëndrueshme në nivel kombëtar. Meteorologët paralajmërojnë se moti i keq pritet të vijojë në ditët në vazhdim për shkak të lëvizjes së ajrit të ftohtë mbi masa ajri më të ngrohtë, duke mbajtur në gatishmëri të lartë të gjitha shërbimet e emergjencës.
Përditësime
Kryeministri Pedro Sanchez paralajmëroi për rëndim të situatës në Barcelonë, ndërsa meteorologët njoftuan vazhdimin e motit të keq në ditët në vazhdim.