Eksportet e zarzavateve nga Shqipëria shënuan rënie të ndjeshme në janar 2026, për shkak të përmbytjeve që dëmtuan zonat kryesore bujqësore dhe serat e specializuara për tregjet e jashtme.
Sipas të dhënave zyrtare të INSTAT, vendi eksportoi 5.367 ton zarzavate në janarin e këtij viti, krahasuar me 9.936 ton në janarin 2025, duke regjistruar një tkurrje prej rreth 46% në baza vjetore. Kjo rënie është më e theksuar, pasi janari 2025 shënoi kulmin e dekadës për këtë kategori.
Viti 2025 u dallua nga zgjerimi i prodhimit në sera dhe kërkesa e lartë nga tregjet europiane, veçanërisht për lakër dhe karota, çka nxiti mbjellje të reja në fushë. Megjithëse ky trend u mbajt edhe këtë sezon, përmbytjet e janarit dëmtuan qindra hektarë të mbjella në ultësirën perëndimore, duke ndikuar në prodhim dhe logjistikë.
Niveli i eksporteve në janar 2026 mbetet më i lartë se shumica e viteve para pandemisë, kur luhatte midis 1.800 dhe 3.800 tonëve. Rritja e viteve të fundit kishte forcuar bazën prodhuese, por ngjarja tregon ekspozimin e sektorit ndaj rreziqeve klimatike.
Përmbytjet goditën drejtpërdrejt prodhimin dhe transportin, duke kufizuar dërgesat drejt Evropës. Pas investimeve në sera dhe rritjes së qëndrueshme, nevoja për infrastrukturë mbrojtëse dhe menaxhim të riskut klimatik është bërë kritike për stabilitetin e eksporteve.
Operatorët presin rikuperim gradual të eksporteve në muajt e ardhshëm, por fillimi i vitit ka rritur pasiguritë për eksportuesit.