Kryetari i Komunës së Prishtinës, Përparim Rama, ka mbajtur konferencë për media në vendin e quajtur Ishulli Urban, ku ka akuzuar institucionet qendrore për bllokim të punimeve. Sipas tij, projekti ka filluar pas ndarjes së buxhetit dhe hartimit të planeve nga komuna, por është ndalur nga Inspektorati për Trashëgimi Kulturore.
Rama ka thënë se platforma e re do të lidhë mbi 30 mijë banorë të lagjes Arbëri me qendrën e qytetit dhe do të përmirësojë sigurinë dhe qarkullimin. Ai ka theksuar se komuna ka ndarë buxhetin, ka realizuar projektin dhe ka filluar punimet, ndërsa qeveria u jep leje sektorit privat.
Kryetari i Prishtinës ka ftuar Prokurorinë që të ndërmarrë masa të menjëhershme ndaj atyre që, sipas tij, bllokojnë projektin pa bazë ligjore. Ai ka shtuar se do të dorëzojë kallëzim penal dhe se punimet do të vazhdojnë edhe në sheshin Xhorxh Bush.