Përparim Rama, kryetar i Prishtinës, i ftuar në emisionin Edicioni Special të Klan Kosova më 17 shkurt 2026, përgëzoi presidenten e Kosovës Vjosa Osmani për pjesëmarrjen në marshin “Drejtësi, Jo Politikë”.
Ai nënvizoi rëndësinë e tejkalimit të ndasive partiake dhe politike në çështje të mëdha kombëtare. “Është shumë pozitive, duhet t’i tejkalojmë ndasitë partiake, politike, kur kemi çështje të mëdha kombëtare. Për këtë arsye po them, se ndoshta tash kur i mbushim 18 vite, nuk jemi adoleshentë, dhe duhet të mendojmë përtej këtyre klikave partiake. I përgëzoj të gjithë politikanët që kanë marrë pjesë dhe u janë bashkuar këtij marshimi”, deklaroi Rama.
Proceset në Hagë
Rama theksoi se në Hagë po gjykohet e ardhmja, historia, paqja dhe liria e Kosovës. “Në Hagë është duke u gjykuar e ardhmja, historia, paqja dhe liria e vendit tonë. E gjitha ajo sakrificë… tash kur kemi arritur të krijojmë këtë mrekulli, kur sot e thërrasim Kosovë, cenohet atje në Hagë, nëse nuk triumfon drejtësia”, shtoi ai.
Festimet e 18-vjetorit të Pavarësisë
Duke folur për festimet e 18-vjetorit të Pavarësisë së Kosovës, Rama tha se kanë pasur një festë të madhe dhe marshin ku kërkuan mbrojtjen e vlerave të UÇK-së. “Sot kemi pasur festë të madhe, kemi kremtuar 18-vjetorin e Pavarësisë dhe patëm marshin, ku kërkuam të mbrohen vlerat e UÇK-së. Të gjitha sheshet kanë qenë të stërmbushura, duhet të jemi të gjithë bashkë kur kemi punë me çështje kombëtare”, përfundoi ai.