Kryetari i Komunës së Prishtinës, Përparim Rama, ka reaguar ndaj akuzave të fundit të përfaqësuesve të Lëvizjes Vetëvendosje (VV), përfshirë asamblisten Berita Abazi, të cilët kanë publikuar mesazhe të pretenduara në Snapchat ku akuzohet për përfshirje në veprime korruptive. Rama i ka hedhur poshtë këto pretendime, duke i cilësuar ato si të pavërteta, të gërditshme dhe si pjesë e një fushate të bazuar në falsifikime e inteligjencë artificiale.
Sipas Ramës, lufta politike nga ana e Lëvizjes Vetëvendosje është degraduar, ndërsa ka theksuar se akuzat lidhur me lëndët e legalizimit janë të pabaza. Për të dëshmuar pastërtinë e proceseve administrative, kryetari i kryeqytetit u ka bërë një ftesë publike asamblistëve të opozitës që të vizitojnë institucionet përgjegjëse.
“Ju bëj ftesë publike, krejt grupit të asamblistëve të VV-së, merreni me vete edhe KALLXO.com e KOHA.net, me të cilët po ju bashkon tendenca për ta diskredituar shtetin, kapuni për dore dhe shkoni në Drejtorinë e Kadastrit dhe në Drejtorinë e Urbanizmit. Shfletojini krejt lëndët, faqe për faqe”, ka deklaruar Rama.
Kryetari i komunës ka kërkuar nga opozita që, pas shqyrtimit të dokumentacionit dhe rrëzimit të fabrikimeve, të dalin publikisht dhe të kërkojnë falje për shpifjet. Ai ka shtuar se përkundër këtyre përplasjeve politike, fokusi i tij kryesor mbetet puna për qytetarët e Prishtinës.