Transmetuesi publik i Austrisë, Zeit im Bild, ka raportuar për përplasje mes protestuesve dhe forcave të policisë në Tiranë, gjatë demonstratave kundër politikave të kryeministrit Edi Rama.
Protesta u zhvillua përpara selisë së qeverisë dhe Parlamentit. Kreu i opozitës dhe i Partisë Demokratike, Sali Berisha, e kishte thirrur demonstratën, ku iu bashkuan qindra mijëra qytetarë. Ata brohorisnin thirrjen “bashkë për të rrëzuar këtë qeveri”.
Gjatë zhvillimit të saj, policia përdori gaz lotsjellës ndaj protestuesve. Një pjesë e tyre tentuan të thyenin kordonin policor përpara Parlamentit, duke hedhur gurë në drejtim të efektivëve. Në disa raste, protestuesit kthyen mbrapsht bombolat e gazit lotsjellës.
Për të shpërndarë turmën, forcat e rendit përdorën gjithashtu topa uji, bashkë me gaz lotsjellës. Ngjarja u transmetua nga media austriake, e cila thekson përplasjet mes të dyja palëve.