Pasditen e së premtes, dy trena të pasagjerëve të kompanisë East Midlands Railway u përfshinë në një përplasje pranë qytetit Bedford në Anglinë qendrore. Aksidenti, i cili ndodhi rreth orës 17:15, ka shkaktuar lëndime, megjithëse autoritetet ende nuk kanë publikuar një bilanc zyrtar të numrit të të prekurve.
Sipas raportimeve, përplasja ndodhi kur një tren që udhëtonte nga Corby goditi nga pas një tren tjetër që po lëvizte nga Nottingham në drejtim të stacionit St. Pancras në Londër. Ngjarja u regjistrua rreth 2.5 milje (4 km) larg stacionit të Bedfordit.
Në vendngjarje kanë mbërritur menjëherë shërbimet e emergjencës, duke përfshirë ambulancat ajrore dhe forcat e policisë. Pamjet e shpërndara në rrjetet sociale tregojnë pasagjerë të lënduar brenda vagonëve të dëmtuar.
Si pasojë e këtij aksidenti, trafiku hekurudhor në zonën e Bedfordit është ndërprerë. Operatori hekurudhor ka kërkuar nga udhëtarët që të shmangin planet e udhëtimit deri në një njoftim të dytë, ndërkohë që autoritetet britanike kanë nisur hetimet për të përcaktuar shkaqet e aksidentit.
Përditësime
Një machinist ka humbur jetën në vendngjarje pas përplasjes së dy trenave midis Lutonit dhe Bedfordit. Bilanci zyrtar raporton 89 të lënduar: 11 në gjendje kritike, 22 në gjendje të rëndë dhe 56 me lëndime të lehta. Në aksident janë përfshirë mjete të kompanive Thameslink dhe East Midlands Railway. Kryeministri Keir Starmer ka shprehur ngushëllimet për tragjedinë, duke siguruar mbështetjen e plotë të qeverisë për ekipet e emergjencës.