Mbrëmjen e 8 marsit 2026, në bulevardin "Dëshmorët e Kombit" në Tiranë, para godinës së Kryeministrisë, u shënuan përplasje mes forcave të policisë dhe mbështetësve të aktivistit Adriatik Lapaj.
Protestuesit kishin vendosur kartonë, karrige dhe sende të tjera në trotuar për të mbështetur protestën e tyre të vazhdueshme. Policia ndërhyri për t’i larguar këto struktura improvizuara, duke i ngarkuar në një mjet policie. Nga pamjet e publikuara në vendngjarje, shihet një numër i konsiderueshëm efektivësh që prishin kartonët e vendosur për mbrojtje nga i ftohti.
Ndërkohë që kryeministri Edi Rama largohej nga ambientet e Kryeministrisë, protestuesit thirrën në kor slogane kundër tij, si "Edi Rama o hajdut".
Gjatë ndërhyrjes, një aktivist u shoqërua në Komisariatin e Policisë nr. 1. Pas këtij incidenti, Adriatik Lapaj bashkë me mbështetësit e tij u drejtuan drejt këtij komisariati, ku po vazhdojnë protestën.
Protesta e nisur më 8 dhjetor 2025 nga Lapaj, në mënyrë simbolike para zyrës së kryeministrit, është mbështetur nga anëtarë të lëvizjes politike "Shqipëria Bëhet" dhe aktivistë të tjerë. Kjo ndërhyrje e policisë ka zhvendosur situatën para Komisariatit nr. 1.