Gjatë mbledhjes së Komisionit për Çështjet Ligjore dhe Administratën Publike është shqyrtuar projektligji për disa shtesa dhe ndryshime në ligjin nr. 9244, datë 17.6.2004, "Për mbrojtjen e tokës bujqësore". Debati është fokusuar te ndikimi i impianteve të energjisë nga era (eolike) në tokën bujqësore, pas pretendimeve të deputetit të Partisë Demokratike, Oerd Bylykbashi, se këto struktura kërkojnë bazamente betoni që dëmtojnë tokën.
Deputeti socialist Damian Gjiknuri mbështeti këtë qëndrim, duke votuar kundër nenit 1 të projektligjit. Ai argumentoi se kullat e erës me lartësi 100 metra nuk mund të instalohen pa struktura betoni, duke mos u bindur nga shpjegimet e përfaqësuesve të drejtorisë përkatëse se strukturat do të ngulen direkt në tokë.
Konflikti u ashpërsua në momentin e votimit të projektligjit në tërësi, kur kryetari i komisionit, Ulsi Manja, refuzoi t'i jepte fjalën Gjiknurit dhe deputetit Toni Strazimiri, duke e konsideruar votën e Gjiknurit si abstenim. Pas këmbënguljes së deputetit socialist për të marrë fjalën, Ulsi Manja i sugjeroi atij të largohej nga mbledhja, duke e ftuar të merrej me deputetin Bylykbashi. Pas këtyre replikave, Damian Gjiknuri u largua nga salla e komisionit.