Mbledhja e Komisionit të Posaçëm Parlamentar për Reformën Administrativo-Territoriale, e zhvilluar në ambientet e Kryesisë së Kuvendit, u shoqërua me debate të forta mes deputetes së Partisë Demokratike, Ina Zhupa, dhe kryebashkiakut të Gramshit, Besion Ajazi.
Tensioni nisi kur Zhupa ndryshoi tematikën e diskutimit duke folur mbi protestat, çka shtyu Ajazin, i ftuar në dëgjesë, t'i kërkonte përqendrimin te çështja për të cilën ishte thirrur takimi. Në kundërpërgjigje, deputetja demokrate u shpreh: "Të nderuar kolegë, nuk kam ndërmend as t’ju kërkoj çfarë do flas, as t’ju pëlqej për atë që po flas. Ju mund të prisni [...] rri aty, mbaj vendin si i ftuar".
Pas kësaj deklarate, bashkëkryetari i komisionit, Arbian Mazniku, ndërhyri duke kritikuar gjuhën e përdorur nga deputetja. "Mos i thuaj asnjë të zgjedhuri nga qytetarët ‘rri e mbaj vendin’. Ai atje ka marrë më shumë vota sa ty", u shpreh Mazniku.
Kjo përplasje ndodh në prag të afatit të 15 korrikut, i cili shënon datën finale për dorëzimin në Kuvend të hartës së re territoriale. Gjatë mbledhjes, opozita ngulmoi për përfshirjen në proces të Kongresit të Autoriteteve Lokale dhe Rajonale pranë Këshillit të Evropës në Strasburg. Mazniku ritheksoi nevojën për respektimin e afateve procedurale, duke sqaruar se vendimmarrja përfundimtare mbi reformën do të mbetet në dorë të Kuvendit të Shqipërisë.