Luftimet midis Ukrainës dhe Rusisë kanë shënuar një përshkallëzim të ri, me sulme të ndërsjella që kanë goditur infrastrukturën energjetike dhe zonat e banuara. Gjatë orëve të fundit, Ukraina lëshoi qindra dronë drejt territorit rus. Autoritetet ruse raportuan se mbi 390 dronë u vunë në shënjestër të sistemeve të mbrojtjes ajrore, ndërsa kryebashkiaku i Moskës, Sergei Sobyanin, konfirmoi rrëzimin e 81 dronëve në afërsi të kryeqytetit rus. Guvernatori i rajonit të Moskës, Andrei Vorobyov, njoftoi për dëme materiale në prona dhe ndërtesa banimi, përfshirë ato në qytetin e Çehovit.
Në rajonin e Rostovit, autoritetet ruse njoftuan për 5 persona të vrarë, përfshirë një fëmijë, si pasojë e sulmeve ukrainase që goditën një terminal eksporti dhe zona banimi. Ndërkohë, në rajonin kufitar të Belgorodit, një person humbi jetën dhe dy të tjerë u plagosën pas goditjes së një objekti tregtar nga një dron ukrainas.
Në anën tjetër të frontit, forcat ruse vijuan sulmet e tyre ndaj objektivave ukrainase. Sipas zyrtarëve ukrainas, në rajonin e Donetskut, 3 persona humbën jetën pranë Kostantinivkës dhe një tjetër pranë Kramatorskut, ndërsa 18 persona mbetën të plagosur. Në rajonin e Dnipropetrovskut, kreu i administratës ushtarake, Oleksandr Khanza, njoftoi për 3 të vrarë dhe 6 të plagosur pas më shumë se 50 sulmeve me artileri dhe dronë. Viktimat u shënuan në qytetin e Nikopolit dhe fshatin Synelnykove.
Sipas Presidentit ukrainas Volodymyr Zelenskyy, sulmet ndaj infrastrukturës ruse, të cilat kanë prekur objekte deri në Udmurt dhe Jarosllavël, synojnë dobësimin e makinës luftarake ruse. Këto zhvillime diplomatike dhe ushtarake zhvillohen paralelisht me vizitën e Zelenskyy në SHBA, ku pritet të zhvillojë bisedime me Presidentin Donald Trump për mbështetjen ushtarake dhe financiare ndaj Ukrainës.