Tensionet ushtarake midis Shteteve të Bashkuara dhe Republikës Islamike të Iranit janë përshkallëzuar pas një serie sulmesh të ndërsjella. Komanda Qendrore amerikane njoftoi se forcat detare dhe ajrore goditën 10 objektiva ushtarake brenda dhe pranë Ngushticës së Hormuzit, përfshirë depo raketash, dronësh dhe sisteme radarësh. Ky operacion erdhi si kundërpërgjigje ndaj goditjes me dron nga ana e Iranit ndaj anijes cisternë me flamur panamez, Kiku.
Në shenjë hakmarrjeje, Garda Revolucionare e Iranit sulmoi me raketa dhe dronë infrastrukturat amerikane në Kuvajt dhe Bahrein. Objektivat përfshinë aeroportin Ali Al Salem në Kuvajt, ku janë të dislokuara forcat amerikane, si dhe bazën e Marinës së SHBA-ve në Bahrein. Për këto sulme, Teherani ka marrë përsipër përgjegjësinë, ndërsa forcat e Gardës Revolucionare paralajmëruan se bazat amerikane në rajon do të përjetojnë një "ferr" dhe se çdo veprim i mëtejshëm do të marrë një "përgjigje të pamëshirshme".
Presidenti amerikan, Donald Trump, përmes një njoftimi në platformën Truth Social, deklaroi se sulmet amerikane u ndërmorën pasi Irani shkeli sërish marrëveshjen e armëpushimit. Ai paralajmëroi se, nëse Teherani vazhdon me veprimet provokuese, administrata e tij mund të detyrohet të ndërmarrë një ndërhyrje ushtarake totale. "Republika Islamike e Iranit do të pushojë së ekzistuari", deklaroi Trump.
Si pala amerikane, ashtu edhe ajo iraniane, kanë akuzuar njëra-tjetrën për thyerje të armëpushimit, ndërsa situata në rajon mbetet tejet e paqëndrueshme.