Ish-deputeti i Partisë Socialiste Petro Koçi foli këtë të mërkurë në studion e News 24 për situatën politike në Shqipëri.
Ai theksoi se zv. kryeministrja Belinda Balluku duhej të ishte dorëhequr që në fillim, kur u ngrit çështja e saj ndaj SPAK-ut, pasi kjo situatë solli shkarkimin dhe pezullimin e saj, si dhe ndryshimet në qeveri. Koçi shtoi se Edi Rama nuk duhej ta delegonte përsëri Ballukun në qarkun e Fierit, edhe pse atje Partia Socialiste fiton lehtë. Ai u shpreh kundër dërgimit të delegatëve nga Tirana në qarqe të tjera, duke preferuar strukturat lokale me mbikëqyrje të kufizuar.
Situata në PS
Koçi deklaroi se në PS nuk ka krizë të dukshme, pavarësisht problemeve të Edi Ramës. Sipas tij, njerëzit votojnë pushtetarët dhe jo vlerën, ndërsa demokracia brendëpartiake vjen në zbritje, si në vendet e tjera evropiane.
Duke komentuar shkarkimin e Elisa Spiropalit nga detyra e ministres së Jashtme, Koçi tha se, nëse Balluku qëndron pas këtij vendimi, do të ishte kompromentuar. Ai u shpreh se PS ka nevojë për më shumë pushtet vendimmarrës për anëtarët.
Koçi cilësoi si risi pozitive ambicien e deputetit Erion Braçe për të kandiduar për Bashkinë e Tiranës. Ai theksoi se nuk ka klimë armiqësore ndaj Braçes brenda partisë dhe profili i tij e bën të përshtatshëm për kryeqytetin.
Kritikat ndaj PD
Koçi akuzoi Sali Berishën se po shkatërron Partinë Demokratike me lidershipin e tij, duke e cilësuar si "kalë të ngordhur". Ai parashikoi se kjo e lehtëson fitoret elektorale të Ramës, pasi qytetarët e zgjedhin si alternativë të qëndrueshme. Protestat e PD i sheh si dështime, me përjashtime të brendshme, retorikë të dhunshme, mungesë shëndeti moral dhe dyshime për burimet financiare.