Ish-deputeti i Partisë Socialiste, Petro Koçi, gjatë një interviste në News24, komentoi zhvillimet politike brenda mazhorancës dhe ambiciet për garat lokale. Ai e përshkroi kandidimin e mundshëm të Erion Braçes për Bashkinë e Tiranës si një risi pozitive për partinë.
Sipas Koçit, pavarësisht qëndrimeve kritike të Braçes ndaj mazhorancës, nuk ka një ambient armiqësor ndaj tij brenda strukturave. Ai e vlerësoi Braçen si një politikan me përvojë shtetërore, skrupuloz dhe të angazhuar, duke e konsideruar atë një kandidaturë optimale që nuk cënon dinjitetin e kandidatëve të tjerë, siç është ministrja Ogerta Manastirliu. Megjithatë, ai theksoi se vendimi final do të merret nga forumet përkatëse të partisë.
Në të njëjtën intervistë, Petro Koçi foli edhe për synimin e ish-deputetit Arben Malaj për të garuar si kandidat i pavarur në Vlorë. Ndonëse vlerësoi kontributin e hershëm të Malajt, ai u shpreh me rezerva ndaj këtij skenari. Sipas tij, një kandidim i pavarur nuk do të ishte i këshillueshëm, pasi rrezikon të mos mirëkuptohet nga elektorati socialist dhe mund të sjellë dëme politike për vetë kandidatin.