Kryetari i Komunës së Prishtinës, Përparim Rama, ka njoftuar pezullimin nga puna të dy inspektorëve të zonës dhe të zyrtarit përgjegjës për lëndën pas shembjes në punishten ndërtimore në rrugën Don Shtjefën Kurti. Ngjarja ndodhi më 29 mars 2026, ndërsa masa u morën menjëherë pas saj.
Në një postim në Facebook, Rama shkruan se punishtet ndërtimore duhet t’i nënshtrohen inspektimit të rreptë dhe të vazhdueshëm nga Inspektorati komunal për të garantuar sigurinë e punëtorëve, qytetarëve dhe cilësinë e punimeve sipas projektit të pranuar. Çdo neglizhencë në këtë drejtim është e patolerueshme.
Përveç procedurave nga Komisioni Disiplinor i Kryeqytetit, Komuna është e hapur për bashkëpunim të plotë me Prokurorinë Themelore në Prishtinë në kuadër të hetimit të nisur për rastin, të cilin Rama e kishte kërkuar menjëherë pas ngjarjes.
Rama rithekson se kompanitë private të ndërtimit duhet të marrin përgjegjësinë e plotë për respektimin e standardeve të sigurisë dhe kushteve të punës. Çdo shkelje nga ana e tyre do të përballet me masa të rënda ligjore, me zero tolerancë ndaj askujt.