Futbollisti i Manchester Cityt, Phil Foden, ka zyrtarizuar vazhdimin e bashkëpunimit me klubin anglez, duke nënshkruar një kontratë të re katërvjeçare, me opsion për zgjatje edhe për 12 muaj të tjerë, e cila do të zgjasë deri në vitin 2030. Marrëveshja konfirmon qëndrimin e 26-vjeçarit në stadiumin “Etihad”.
Me këtë rinovim, bien poshtë zërat që lidhnin lojtarin me një kalim të mundshëm te skuadra e Milanit. Foden, i cili është rritur në akademinë e Manchester Cityt që nga mosha tetëvjeçare, është bërë një nga figurat më të spikatura të klubit, duke regjistruar 369 paraqitje. Ai mban rekordin si futbollisti më i dekoruar në skuadrën aktuale me 17 trofe madhorë, duke përfshirë gjashtë tituj të Premier League dhe një Ligë të Kampionëve.
Pas një sezoni sfidues, ku mbeti jashtë grumbullimit të kombëtares së Anglisë për Kupën e Botës 2026 nga përzgjedhësi Thomas Tuchel, klubi ka shprehur besim të plotë te potenciali i tij. Futbollisti ka vlerësuar rikthimin e trajnerit Enzo Maresca në krye të ekipit, me të cilin ka bashkëpunuar më parë gjatë periudhës së tripletës në vitin 2023. Drejtuesit e klubit, përfshirë drejtorin sportiv Hugo Viana, e konsiderojnë Fodenin si një shtyllë të rëndësishme të projektit të ri sportiv.