Qindra njerëz u rreshtuan të martën në Hong Kong për të parë nga afër pikturën “Pemët e gështenjës në lulëzim” të Vincent van Goghut, e cila nuk ishte ekspozuar publikisht për më shumë se gjashtë dekada. Vepra pritet të dalë në ankand më 18 nëntor në shtëpinë e ankandeve Sotheby’s, në Nju Jork, me një vlerë të parashikuar shitjeje prej 180 milionë dollarësh.
Van Gogh e realizoi pikturën në maj të vitit 1890, gjatë qëndrimit në fshatin francez Auvers-sur-Oise. Ajo paraqet një gështenjë të madhe në lulëzim, me një kurorë të dendur që zë pjesën më të madhe të kompozimit. Vepra konsiderohet ndër krijimet më të rëndësishme të periudhës së fundit të artistit, i cili vdiq rreth dy muaj pas realizimit të saj, në moshën 37-vjeçare.
Scott Nitchel, drejtues i departamentit të artit modern dhe bashkëkohor të Sotheby’s në Nju Jork, tha se piktura mund të vendosë rekord të ri ankandi për veprat e Van Goghut. Ai e përshkroi si një krijim që pasqyron optimizmin, energjinë, entuziazmin dhe ngjyrat e gjalla të asaj periudhe të artistit.
Mes vizitorëve në Hong Kong ishte Li Shanshan, 50 vjeç, i cili udhëtoi rreth dy orë e gjysmë nga qyteti kinez i Shenzhenit për ta parë veprën. Ai tha se nuk kishte dëgjuar më parë për pikturën dhe se dëshironte ta shihte nga afër.
Në ankand do të ofrohen edhe 11 piktura që nuk janë ekspozuar publikisht prej një kohe të gjatë. Koleksioni përfshin vepra të Paul Cézanne dhe Claude Monet. Pesë prej tyre u prezantuan në Sotheby’s në Londër në fund të shtatorit, përfshirë “Harlequin” të Cézanne dhe “Kopshti i Qeramikës” të Monet.
Historia e pikturës
Pas vdekjes së Van Goghut, në korrik të vitit 1890, piktura kaloi te vëllai i tij, Theo, dhe më pas te bashkëshortja e këtij të fundit, Johanna van Gogh-Bonger, dhe djali i tyre, Vincent Willem. Më vonë, vepra u ble nga botuesi gjerman Samuel Fischer, themelues i shtëpisë botuese S. Fischer Verlag, dhe më pas u përfshi në koleksionin e kompozitorit dhe producentit amerikan George “Buddy” DeSilva, një prej bashkëthemeluesve të Capitol Records.
Koleksionistja Harriet Harris-Jonas e bleu pikturën në vitin 1953. Muzeu Metropolitan i Artit në Nju Jork organizonte vizita për mbështetësit në apartamentin e saj në Fifth Avenue, ku ata mund të shihnin koleksionin. Në vitin 1975, familja Blackie e bleu veprën përmes tregtarit të artit Wildenstein. Ajo qëndroi larg publikut deri në shfaqjen e saj në Hong Kong.