Një përleshje fizike mes disa personave ka degjeneruar në përdorimin e armës së zjarrit, duke lënë dy persona të plagosur. Ngjarja ka ndodhur të dielën, më 26 korrik 2026, rreth orës 18:50 në Podujevë.
Sipas njoftimit zyrtar të Policisë së Kosovës, gjatë konfliktit, njëri nga të dyshuarit ka shtënë me armë, duke shkaktuar plagosjen e dy meshkujve kosovarë. Të lënduarit janë dërguar menjëherë për trajtim mjekësor në Qendrën Klinike Universitare të Kosovës (QKUK).
Në vendin e ngjarjes, forcat e rendit kanë kryer ekzaminimet e nevojshme dhe kanë sekuestruar provat materiale, përkatësisht 2 gëzhoja dhe 3 automjete. Me vendim të prokurorit, janë arrestuar 6 persona të përfshirë në përleshje, të cilët pas intervistimit janë dërguar në mbajtje. Policia e ka cilësuar rastin si "vrasje e rëndë në tentativë".
I dyshuari kryesor që ka shtënë me armë zjarri ende nuk është kapur nga autoritetet. Ai është shpallur në kërkim policor dhe po punohet për lokalizimin dhe arrestimin e tij.