Platin Velaj, shtetas shqiptar 41-vjeçar, i shpallur në kërkim ndërkombëtar nga autoritetet shqiptare, u arrestua në qytetin Fasano të Italisë.
Arrestimi u krye nga efektivët e GICO-s, njësi pranë Policisë Ekonomiko-Financiare të Leçes, në kuadër të një operacioni hetimor. Ai u ndalua me një urdhër-arresti të përkohshëm për ekstradim drejt Shqipërisë, në zbatim të urdhrit të lëshuar më 10 mars 2022 nga Gjykata Penale e Lushnjës.
Velaj ishte dënuar me 2 vite burg për veprën penale të mbajtjes pa leje të armëve dhe lëndëve plasëse, të kryer në dhjetor 2015 në ambientet e një lokali në Shqipëri.
Gjatë kontrollit në banesën ku qëndronte, autoritetet italiane sekuestruan një pistoletë kalibrit 7.65 me numër serie të fshirë dhe karikator të mbushur me 4 fishekë, si dhe dokumente identifikimi të falsifikuara, të cilat dyshohet se i shërbenin për të shmangur arrestimin gjatë arratisjes.
I arrestuari u referua në Prokurorinë e Brindizit për mbajtje të paligjshme të armëve dhe municioneve në Itali dhe u dërgua në burgun e Brindizit.
Autoritetet italiane kanë nisur hetime të mëtejshme ndaj një shtetaseje shqiptare, e cila dyshohet se e ka strehuar Velaj-n gjatë periudhës së arratisjes.