Pogradeci u shpall fitues i fazës play-off në Kategorinë e Parë, duke mundur Besën me rezultatin 1-0 në finalen për të drejtën e play-out kundër Superiores.
Ndeshja u mbyll në barazim 0-0 në kohën e rregullt. Në kohën shtesë, Indio Oliveira shënoi golin e vetëm në minutën e 105-të, duke i dhënë fitoren skuadrës liqenore.
Skuadra kavajase krijoi raste në fillim të takimit me lojtarë si Greca dhe Chinwendu, por rrjetat mbetën të paprekura. Në pjesën e dytë pati shanse nga të dyja palët, por asnjë gol nuk u shënua derisa u kalua në shtesë.
Takimi u karakterizua nga tensioni i lartë. Arbitri nxori tre kartonë të kuq: Neto dhe Kofi për Besën, që mbeti me nëntë lojtarë, dhe Kazim për Pogradecin, që luajti me dhjetë.
Pas këtij suksesi, Pogradeci do të përballet me Teutën, e cila mbylli sezonin në vendin e tetë të Abissnet Superiores. Ndeshja e play-out zhvillohet më 16 maj në orën 16:00 në stadiumin Niko Dovana të Durrësit.
Për liqenorët kjo është hera e dytë radhazi në këtë fazë, pas dështimit të vitit të kaluar kundër Tiranës.
Përditësime
Ndeshja Pogradec–Besa u zhvillua në Arenën e Elbasanit.