Kandidatura e Andrea Pirlos për postin e trajnerit të kombëtares italiane të futbollit është shoqëruar me polemika publike, edhe pse ai ende nuk është emëruar zyrtarisht në këtë detyrë. Diskutimet përqendrohen te rolet e tij si ambasador global i kompanisë ruse të basteve, Fonbet, një bashkëpunim që është interpretuar nga kritikët si një formë e propagandës në favor të Rusisë në një periudhë konflikti me Ukrainën.
Lidhja e Pirlos me këtë kompani ka filluar gjatë kohës kur ai drejtonte skuadrën United FC në Emiratet e Bashkuara Arabe. Klubi është në pronësi të Sergey Lomakin, i cili zotëron interesa të konsiderueshme edhe te kompania Fonbet. Polemikat u thelluan pas pjesëmarrjes së Pirlos në aktivitetin "Football Day" të mbajtur në kryeqytetin rus, një vendim ky që u kritikua ashpër nga figura të sportit ndërkombëtar, përfshirë atletin ukrainas të skeletonit, Vladyslav Heraskevych.
Megjithatë, vëzhguesit theksojnë se Andrea Pirlo nuk ka shkelur asnjë dispozitë ligjore me këto marrëveshje, pasi bëhet fjalë për angazhime të një profesionisti të lirë. Pritet që këto polemika të marrin fund me zyrtarizimin e mundshëm të tij në krye të kombëtares italiane. Sipas rregulloreve, posti i trajnerit të kombëtares është një detyrë institucionale që ndalon në mënyrë të prerë mbajtjen e kontratave me kompani bastesh. Si rrjedhojë, emërimi i tij në stolin e "Axurrëve" do të çonte automatikisht në ndërprerjen e marrëdhënieve profesionale të Pirlos me kompaninë Fonbet.
Përditësime
Zyra ligjore e Andrea Pirlos ka nisur zyrtarisht hartimin e dokumentacionit për shkëputjen e kontratës me United FC. Aktivizimi i klauzolës përkatëse i mundëson Pirlos largimin pa penalitete financiare. Përfaqësuesit e tij sqaruan se marrëveshja e sponsorizimit me Fonbet nuk përbën pengesë ligjore për marrjen e postit të trajnerit të Kombëtares Italiane.
Andrea Pirlo ka thyer heshtjen pas polemikave në rrjetet sociale lidhur me emërimin e tij si trajner i Italisë. Ish-mesfushori sqaroi se bashkëpunimi i tij me kompaninë e basteve Fonbet është një marrëveshje ekskluzivisht tregtare, duke hedhur poshtë pretendimet për prapavijë politike. Në këtë reagim, Pirlo shprehu gjithashtu mirënjohjen ndaj Paolo Maldinit dhe Leonardos për mbështetjen e tyre.