Policia e Kosovës ka njoftuar se më 22 mars 2026, nga ora 09:00 deri në 11:00, do të bllokohet përkohësisht segmenti i rrugës nacionale N2 nga Prishtina Mall deri në Veternik dhe anasjelltas.
Arsyeja e bllokimit është organizimi i garës ndërkombëtare të vrapimit rrugor „Kosova në Lëvizje”, e planifikuar nga Federata Atletike e Kosovës (FAK). Kjo federatë ka marrë pëlqimin e Ministrisë së Infrastrukturës për zhvillimin e garës në këtë segment rrugor (Prishtina Mall – Veternik – QMI).
Policia e Kosovës do të asistojë FAK-un në bllokimin e trafikut gjatë këtij periudhe. Autoritetet kërkojnë mirëkuptim nga pjesëmarrësit në trafik dhe i lutin ata të shmangin segmentin e mbyllur, duke përdorur rrugë alternative.