Policia e Kosovës ka shpallur proces të ri për gradimin e zyrtarëve policorë në gradën rreshter, me 430 pozita të lira. Procesi vjen pas anulimit të konkursit të mëparshëm, të shpallur në vitin 2024, i cili parashihte 355 vende dhe u shoqërua me ankesa e dyshime për parregullsi. Inspektorati Policor i Kosovës (IPK) kishte rekomanduar anulimin.
Sipas memorandumit të Drejtorisë për Zhvillim të Performancës dhe Karrierës, procesi mbështetet në Ligjin për Policinë, udhëzimin administrativ për procedurën e gradimit të zyrtarëve policorë dhe miratimin e drejtorit të përgjithshëm. Numri i vendeve është përcaktuar pas analizës së nevojave për personel të graduar, strukturës organizative dhe listës së personelit të autorizuar.
Memorandumi përcakton se procesi do të udhëhiqet nga parimet e ligjshmërisë, transparencës, trajtimit të barabartë, meritës dhe llogaridhënies. Kandidatët do të përzgjidhen sipas renditjes në listën meritore dhe kritereve të zbatueshme të gradimit. Fazat e procesit, aktet dhe njoftimet përkatëse janë publikuar në intranetin e Policisë së Kosovës.
Konkursi i mëparshëm ishte shpallur më 12 shkurt 2024. Pas ankesave të kandidatëve dhe dyshimeve për parregullsi, IPK-ja nisi inspektimin e procesit. Sipas raportimeve të Dukagjinit, dyshimet përfshinin pretendime për favorizime të mundshme dhe shpërndarjen e testit për një grup kandidatësh para kohës së paraparë.
Në dhjetor të vitit 2024, kryeshefi i IPK-së, Kushtrim Hodaj, foli për mangësi të evidentuara gjatë inspektimit. Ai përmendi dilema nëse një gjeneratë zyrtarësh i plotësonte kushtet për testim, për shkak të afatit të qëndrimit në një gradë, si dhe mospërputhje mes disa kërkesave të konkursit dhe rregulloreve. Hodaj tha gjithashtu se mungonte monitorimi i duhur me kamera. Testimi u zhvillua në pesë qendra, gjë që, sipas tij, e vështirësoi menaxhimin dhe mbikëqyrjen.
IPK-ja evidentoi dobësi në fazën e konkurrimit dhe dha tetë rekomandime. Ato përfshinin harmonizimin e bazës ligjore, qartësimin e kritereve të aplikimit, verifikimin e kushteve të kandidatëve dhe përmirësimin e përgatitjeve teknike e administrative. Pas rekomandimeve, Policia e Kosovës anuloi konkursin.
Ministri i Punëve të Brendshme, Xhelal Sveçla, e mirëpriti shpalljen e procesit të ri, duke e cilësuar atë si mundësi për avancimin profesional dhe vlerësimin e meritës. Ai u bëri thirrje veçanërisht grave dhe vajzave të aplikojnë, duke theksuar rëndësinë e përfaqësimit dhe fuqizimit të tyre në Policinë e Kosovës.