Policia e Kosovës ka konfirmuar se biznesmeni kosovar Valon Ademi dhe drejtori i Investimeve Kapitale në Komunën e Prishtinës, Sokol Havolli, janë përfshirë në një përleshje fizike. Ngjarja ka ndodhur mbrëmjen e 30 janarit në një lokal në qendër të Prishtinës.
Nga Policia e Rajonit të Prishtinës kanë dhënë sqarime të martën, duke konfirmuar se rasti është inicuar si “Lëndim i Lehtë Trupor”. “Ju njoftojmë se rasti është raportuar në polici dhe në koordinim me Prokurorin e Shtetit është hapur rast për veprën penale ‘Lëndim i Lehtë Trupor’. Të gjitha veprimet e radhës do të ndërmerren në koordinim me Prokurorin e Shtetit”, thuhet në përgjigjen zyrtare të Policisë për Reporteri.net.
Detajet e incidentit
Incidenti ka nisur me një përplasje verbale midis të dyve, të cilët po qëndronin në të njëjtin lokal në Prishtinë. Sulmi me grusht nga ana e Valon Ademit ndaj Sokol Havollit ka ndodhur kur ky i fundit po largohej nga lokali.
Sfondi i personave të përfshirë
Emri i Valon Ademit është përmendur kohët e fundit në Shqipëri për lidhje me investime rreth Aeroportit të Vlorës, ku ai është vënë në qendër të diskutimeve publike.
Sokol Havolli ka mbajtur më parë funksione të rëndësishme në Kosovë, si zëvendësguvernator i Bankës Qendrore të Kosovës dhe drejtues i ndërmarrjes publike “Parking Prishtina”. Ai ka qenë kandidat i Lidhjes Demokratike të Kosovës (LDK) për deputet në zgjedhjet e fundit parlamentare, por nuk ka siguruar votat e mjaftueshme për t’u zgjedhur.