Më 2 dhe 3 korrik 2026, në Kampin e Njësive Speciale në Vrellë, strukturat e sigurisë në Kosovë zhvilluan ushtrimin e përbashkët operacional të koduar “Shpata e Artë 2026-1”. Stërvitja synoi forcimin e bashkëpunimit ndërinstitucional dhe rritjen e gatishmërisë për reagim të koordinuar në situata me rrezik të lartë.
Skenari i ushtrimit përfshiu disa simulime taktike:
• reagimin ndaj kërcënimeve të sigurisë;
• identifikimin dhe menaxhimin e mjeteve shpërthyese;
• përballimin e protestave të dhunshme;
• evakuimin e personave;
• përdorimin e mjeteve të specializuara në terren.
Në këtë aktivitet u angazhuan njësi operative dhe mbështetëse të Policisë së Kosovës, duke përfshirë Drejtoria e Njësive Speciale Operative (DNJSO), Njësia për Reagim të Shpejtë (NJRSH), Njësia për Trajtimin e Mjeteve Eksplozive (NJTME), Njësia për Deminim dhe Asgjësim (NJDA), Drejtoria për Siguri dhe Shëndet në Punë (DSHSH), si dhe njësitë e Rendit Publik.
Ushtrimi u ndoq nga përfaqësues të lartë të institucioneve pjesëmarrëse dhe partnerëve ndërkombëtarë, të cilët vlerësuan profesionalizmin dhe disiplinën operacionale të treguar gjatë zbatimit të skenarit. Policia e Kosovës rikonfirmoi përkushtimin për ngritjen e vazhdueshme të kapaciteteve dhe garantimin e rendit publik në të gjithë territorin e Republikës së Kosovës.