Një 14-vjeçar është shoqëruar nga specialistët e Seksionit për Hetimin e Krimeve në Komisariatin e Policisë Krujë, pasi dyshohet se ka tentuar të vjedhë një market në pedonalen e qytetit. Ngjarja, e cila është pasqyruar edhe në rrjetet sociale, ndodhi gjatë orëve të para të mëngjesit të ditës së mërkurë.
Sipas njoftimit zyrtar, i mituri ka përdorur një çekiç për të thyer xhamat e marketit. Policia ka sekuestruar mjetin e fortë dhe veshjet që autori i dyshuar mbante në momentin e ngjarjes. Pas identifikimit dhe shoqërimit, i mituri po i nënshtrohet procedurave ligjore të nevojshme, të cilat po zhvillohen në përputhje me legjislacionin në fuqi për mbrojtjen e të miturve, në prani të prindërve, mbrojtësit ligjor dhe një psikologu.
Gjatë procesit hetimor, policia po punon për të zbardhur rrethanat e plota të ngjarjes. Materialet procedurale i janë referuar Prokurorisë për hetime të mëtejshme.