Gjatë kontrolleve në lagjen “Baba Rexhepi” në Sarandë, shërbimet e policisë kanë gjetur një motor të braktisur pranë bregdetit, në zonën e njohur si “Kasollja”. Mjeti, i cili nuk paraqet shenja dëmtimi, pritet t’i nënshtrohet ekzaminimeve laboratorike për gjetjen e materialit gjenetik që mund të çojë në identifikimin e personave të përfshirë në atentatin ndaj Thimjo Rubatit.
Hetuesit dyshojnë se autorët kanë pasur njohuri paraprake mbi sigurinë e zonës, përfshirë faktin se policia kishte sekuestruar pajisjet DVR të kamerave të sigurisë një natë më parë. Kjo rrethanë besohet se është shfrytëzuar nga autorët për ta kryer sulmin në një hapësirë pa mbikëqyrje elektronike.
Sipas informacioneve nga grupi hetimor, ekzistojnë dyshime se atentati ka qenë i organizuar. Një ndër elementët që po analizohet është përdorimi i një konflikti të ndodhur një ditë para ngjarjes, ku djali i viktimës u përfshi në një përplasje me një oficer policie, me qëllim krijimin e konfuzionit në pistat e hetimit. Për shkak të gjetjes së motorit buzë detit, policia nuk përjashton mundësinë që autorët të jenë larguar me mjete lundruese ose të jenë strehuar në banesa në periferi të qytetit.
Aktualisht, përqendrimi i punës hetimore është fokusuar në dy pista kryesore:
• Konflikt pronësie.
• Përplasje personale për motive të tjera.
Ndërkohë, pistat që lidhen me larjen e hesapeve apo hakmarrjen vlerësohen si të pakta, për shkak të mungesës së provave dhe indicieve të mjaftueshme deri në këtë fazë të hetimit.