Altin Ndoci, 38-vjeçar, u arratis ditën e martë nga Spitali i Durrësit dhe dyshohet se ka hyrë në Tiranë. Policia ka zgjeruar kërkimet në kryeqytet dhe rrugët lidhëse.
Itinerari i lëvizjes së tij është zbardhur përmes kamerave të sigurisë. Pas daljes nga spitali, Ndoci u largua me një automjet tip Audi A7, duke kaluar në zonën e Spitallës, më pas në Shënavlash, vijoi në autostradë dhe dyshohet se hyri në Tiranë.
Kontrolli policor është kryer në zona të ndryshme të Tiranës, si Astir, Don Bosko, Selitë, si dhe në banesën e tij në Yzberisht. Si rrugë lidhëse me Durrësin, janë kontrolluar edhe zona të rrugës së Ndroqit.
Familjarët e Ndocit kanë deklaruar se nuk kanë dijeni për vendndodhjen e tij. Kërkimet vazhdojnë intensivisht.
Sa i përket shoqërimit drejt spitalit, Policia e Durrësit ka njoftuar se nuk kishte mbështetje sigurie shtesë, si zakonisht për të paraburgosurit. Burgu i Durrësit nuk e njoftoi policinë me shkresë ose e-mail për shoqërimin e Ndocit, ndryshe nga një rast tjetër të së njëjtës dite, ku policia kryen shoqërimin për varrimin e një familjari të një të dënuari tjetër. Policia u njoftua menjëherë pas arratisjes dhe nisi kontrollet.
Përditësime
Altin Ndoci, i paraburgosur për vepra të rënda penale, goditi një punonjës sigurie për të arratisur nga kati i tretë i Spitalit Rajonal të Durrësit, në repartin infektiv me zonë sigurie të veçantë.
Altin Ndoci mungoi në seancën gjyqësore për dosjen 'Plumbi i Artë' në GJKKO. Drejtoria e Burgjeve ka njoftuar gjykatën me shkresë zyrtare për arratinë e tij. Hetimet tani përfshijnë vizitorët e 6 muajve të fundit në burg si dyshuar organizatorë dhe tabulatë telefonike. Autoritetet kanë kryer kontrole në Pukë, vendlindjen e tij, dhe Elbasan. Ndoci u shoqërua pa pranga dhe vetëm nga 2 efektivë, ndaj protokolli kërkon 4.