Policia Rajonale e Ferizajt u ka kërkuar qytetarëve ndihmë për identifikimin dhe lokalizimin e një personi të dyshuar për veprën penale “shpërdorim i pasurisë së huaj”. Rasti dyshohet se ka ndodhur më 11 shtator 2026, në rrugën “Qamil Ilazi”, në Ferizaj, pasi një personi i kishte rënë kuleta.
Sipas njoftimit të policisë, i dyshuari dyshohet se e ka marrë kuletën në mënyrë të kundërligjshme, me qëllim përvetësimin e pasurisë së një personi tjetër. Me autorizim të prokurorit të Shtetit, policia ka publikuar fotografinë dhe videon e personit të dyshuar.
Qytetarët që kanë informacione për identitetin ose vendndodhjen e tij mund ta njoftojnë Policinë e Kosovës përmes numrit emergjent 192, në stacionin më të afërt policor ose përmes aplikacionit digjital “Lajmëro Policinë”. Policia ka bërë të ditur se informacionet do të trajtohen me konfidencialitet të plotë dhe se bashkëpunimi i qytetarëve mund të ndihmojë në zbardhjen e rastit.