Gjatë pasdites së së dielës, efektivët e policisë kanë ndërhyrë për të larguar qytetarët që kishin një javë që qëndronin përpara godinës së Kryeministrisë. Pas largimit të protestuesve, forcat e rendit kanë mbledhur këpucët e vendosura në shkallët e objektit, të cilat përdoreshin nga organizatorët si një instalacion artistik që simbolizon mungesën e shpresës dhe largimin e të rinjve nga vendi.
Ndërhyrja ka shkaktuar reagime nga ana e protestuesve, të cilët kanë kundërshtuar veprimin e policisë, duke e cilësuar atë si cenim të vullnetit popullor dhe të hapësirës publike. Gjatë këtij momenti janë shënuar përplasje verbale midis qytetarëve dhe kordonit të sigurisë të krijuar nga efektivët.
Kjo protestë, e cila vijon prej një jave, ka në fokus kërkesën për dorëheqjen e kryeministrit Edi Rama. Sipas organizatorëve, tubimi i sotëm shënon protestën e 29-të radhazi, ndërsa qytetarët janë ftuar për pjesëmarrje në vazhdimësi të kërkesave të tyre.