Më 22 tetor, Policia e Shtetit mohoi se kishte dërguar mesazhe intimiduese te mësuesit dhe pedagogët që morën pjesë në tubim, si dhe hodhi poshtë raportimet për dorëheqje masive nga radhët e saj. Në një deklaratë për mediat, Albert Nushi, shef i Sektorit të Drejtimit në Departamentin për Sigurinë Publike, tha se mesazhet ishin dërguar nga persona ende të paidentifikuar.
Sipas deklaratës, disa mësuesve dhe pedagogëve u ishin dërguar mesazhe në emër të Policisë, ku pretendohej se ishin filmuar gjatë tubimit dhe se do të kontaktoheshin për t’u komunikuar akuza. Policia tha se mesazhet nuk vinin nga institucioni dhe se synonin përhapjen e panikut dhe dëmtimin e besimit të qytetarëve.
Nushi u shpreh se tubimi paqësor është e drejtë kushtetuese dhe se Policia ka detyrimin ligjor ta respektojë dhe ta garantojë. Ai shtoi se pretendimet e kundërta nuk përputhen me njoftimet dhe daljet publike të institucionit.
Policia mohoi gjithashtu raportimet për dorëheqje masive nga radhët e saj. Nushi tha se asnjë drejtues policie nuk kishte dhënë urdhra të kundërligjshëm për ushtrimin e dhunës gjatë ditëve të tubimit.
Deklarata trajtoi edhe pamjet e publikuara nga aeroporti i Rinasit, të cilat shoqëroheshin me pretendimin se shtetas të huaj po silleshin në Shqipëri për t’u mbajtur në burg. Sipas Policisë, bëhej fjalë për shtetas që transportoheshin nga Italia drejt qendrës së pritjes për emigrantët e paligjshëm në Gjadër.
Policia u bëri thirrje qytetarëve të mos u besojnë informacioneve që, sipas saj, synojnë të cenojnë misionin ligjor dhe besimin te institucioni.