Policia e Kosovës, përmes Drejtorisë për Hetimin e Trafikimit me Narkotikë në Mitrovicë-Jug, ka zhvilluar një operacion të planifikuar më 12 shkurt 2026, rreth orës 17:40.
Në parkingun e Stacionit të Autobusëve në Mitrovicë, policia ka ndaluar për verifikim një person të dyshuar. Gjatë kontrollit trupor, atij i janë gjetur tre qese me substancë të dyshuar narkotike të llojit kokainë, me peshë të përgjithshme 0.99 gram.
Pas konsultimit me Prokurorin Kujdestar pranë Prokurorisë Themelore në Mitrovicë, është kryer kontroll në banesën e të dyshuarit. Atje u gjet një armë e gjatë automatike me një karikator që përmbante 17 fishekë të kalibrit 9×19 mm, si dhe një pistoletë me një karikator të zbrazët.
Të gjitha armët dhe substancat narkotike u fotografuan, evidentuan dhe sekuestruan nga njësia e Krimteknikës Rajonale.
I dyshuari u intervistua në prani të avokatit mbrojtës të caktuar sipas detyrës zyrtare. Pas intervistimit, me vendim të Prokurorit të Shtetit, ai u lirua në procedurë të rregullt.
Rasti është iniciuar për veprat penale “Posedim i paautorizuar i narkotikëve, substancave psikotrope ose analoge” dhe “Mbajtja në pronësi, kontroll ose posedim të paautorizuar të armëve” sipas Kodit Penal të Republikës së Kosovës. Hetimet vazhdojnë nga antidroga e Mitrovicë-Jug.